Ես ո’չ աղանդավոր եմ, ո’չ կուսակցական, ես դորիանսական եմ

Ինչու՞ ֆեյսբուքյան ձեր էջում տեղադրեցիք Եվրատեսիլին առչվող թեմաներ:

Վահագն Գևորգյան – Մեզ հետաքրքիր էր իմանալ մարդկանց կարծիքը այս թեմայի վերաբերյալ:

Ի՞նչ պայմաններ են անհրաժեշտ, որպեսզի մասնակցեք Բաքվում կայանալիք մրցույթին:

Վահագ Գևորգյան - Մենք Եվրատեսիլին մասնակցելու տենդով երբեք չենք տառապել, սակայն Ադրբեջանի հաղթանակից հետո մի քանի անգամ հայտարարել ենք, որ անվտանգության երաշխիքների դեպքում պատրաստ ենք ներկայացնել Հայաստանը Բաքվում: Մեր գլխավոր պայմանը երկրի կողմից անվտանգության երաշխիքն է: Ու չնայած չգիտենք` ինչ ընթացք կստանա եվրատեսիլյան թեման, բայց մենք պատրաստել ենք մի երգ, որի բառերը մեր ֆեյսբուքյան խմբում տեղադրված են:

Եկեք վերադառնանք ռոքին: Տարիներ առաջ ո’չ հեռուստատեսությունը, ո’չ ռադիոն չէր հեռարձակում ռոք երաժշտություն, հետո սկսեցին հեռարձակել, ինչի արդյունքում էլ միանգամից ռոք խմբերը շատացան քանակապես, բայց ոչ բոլորը որակ ապահովեցին: Ի՞նչ կասեք այս մասին:

Գոռ Սուջյան - Մենք «underground»-ի տարիներին շատ լավ ու տաղանդավոր երաժիշտներ ու խմբեր ենք ունեցել` «Մելոմանները», «Ոստան Հայոցը», հին ու նոր «Բամբիռները» և շատ ուրիշ խմբեր: Սրանից հետո մի պահ կար, որ ռաբիսը մարդկանց կերել էր, չնայած հիմա էլ քիչ չի ուտում, ինչն էլ որակի վրա ազդեց: Բայց մարդիկ այսօր կարողանում են ընտրություն կատարել, այսօր այլընտրանքի հնարավորություն կա:

Այսինքն նորմա՞լ է, որ կան այսքան շատ խմբեր, որոնցից արժեքավոր գործեր շատ քչերն են ստեղծում:

Գոռ Սուջյան - Այո, նորմալ է, ես կարող եմ ասել, թե ինձ համար ովքեր են արժեքավոր` «Բամբիռը», «Էմփիռեյը», «Ռեինկարնացիան», «Կատուները», Սուրեն Առուստամյանի խումբը, հիմա կարող է մոռանամ ուրիշներին… Վատ ասածը մի քիչ հարաբերական է, քանի որ նոր խմբեր են ստեղծվում ու բնական է, որ դրանք միանգամից «Led Zeppelin» չեն կարող դառնալ:

Իսկ ինչպե՞ս եք նայում նրան, որ ռոք երգիչները, ովքեր Հայաստանում համարվում են ռոք պրոպագանդողներ, նաև այլ երաժշտություն են երգում, որը կապ չունի ռոքի հետ:

Գոռ Սուջյան - Այս երկրում նորմալ է. եթե երկիրը չի նպաստում, որ երաժիշտն իրեն կարողանա ապահովել միայն մի ոճում երգելով, ապա նորմալ է:

Այսօր մեզանում ռոքի զարգացման համար ի՞նչ խոչընդոտներ կան:

Գոռ Սուջյան – Խոչընդոտներն առաջ ավելի շատ էին, քան հիմա: Այսօր քեզ դրսևորելու հնարավորություններն ավելի շատ են: Եթե մարդ տաղանդավոր է, ապա, հաստատ, տաշած քարը գետնին չի մնա:

Որպես ռոք երաժշտության մեջ ստեղծագործող մարդ, ի՞նչ է քեզ համար ռոքը:

Գոռ Սուջյան - Ռոքն ինձ համար երաժշտական ոճ է, ինչպես ջազը, բլյուզը: Ընդհանրապես երաժշտությունը` արվեստին մոտ երաժշտությունը, մարդկանց իրենց հոգսերից շեղելու միջոց է: Ես սիրում եմ անհատականություններին, որ լսես ու ասես` սա «Led Zeppelin»-ն է, սա` «Sting»-ն է: Նրանք բոլորն ինձ համար տարբեր գույներ են, իսկ երաժշտության մեջ գույնը շատ կարևոր է, որ լսես ու կարողանաս երգչի աշխարհի մեջ մտնել:

Ձեր հանդիսատեսը ձեր աշխարհ մտնու՞մ է:

Գոռ Սուջյան - Համերգների վերջում մեզ մոտենում են ու ասում են` շնորհակալ ենք ձեզ, մենք մտանք ձեր աշխարհ ու տեսանք, որ ամեն ինչ այս կյանքում շատ սիրուն է: Մեր «Life is really beautiful» երգը լսելուց հետո մի աթեիստ աղջիկ, խոստովանեց, որ սկսել է հավատալ Աստծուն: Դա շատ լավ գնահատական էր, քանի որ ես ինքս Աստծուն շատ եմ հավատում, ֆանատ չեմ ու ոչ էլ աղանդավոր, հավատում եմ Աստվածաշնչում գրվածին, որտեղ ինչ գրված է, լինում է: Ես ո’չ աղանդավոր եմ, ո’չ կուսակցական, ես դորիանսական եմ:

Ի՞նչ ես կարծում` ռոքն այսօր ծառայու՞մ է որպես հասարակական բողոքի արտահայտման կամ խնդիրներ բարձրաձայնելու միջոց:

Գոռ Սուջյան - Ընդհանրապես, երաժշտությունը պետք է նպաստի խնդիրների վերացմանը: Մենք այսօր լիքը խնդիրներ ունենք, մեկը այն, որ չենք ժպտում, միշտ մունաթ դեմքերով ենք: Օրինակ ուրիշ երկրում, երբ ինքնաթիռից իջնում ես, ժպիտով են գալիս քեզ դիմավորելու, իսկ Հայաստանում` տխուր դեմքով: Մենք ունենք խմբեր, որոնք ջազ են նվագում կամ ռեգգի, բոլորն էլ իրենց ասելիքն ունեն ու փորձում են ինչ-որ բան փոխել: Կոնկրետ ես փորձում եմ սեր քարոզել, բայց 8-րդ դասարանի սերը չէ: Սերը շատ գլոբալ ու խորը թեմա է, ասում են` սերն ունի երկու ասպեկտ. առաջինը, երբ սպանում ես քո էգոն, երկրորդը, երբ ապրում ես դիմացինի համար: Մեր պատկերացմամբ սերը հենց դա է, և այդ ենք փորձում քարոզել:
Շատ ուրիշ խնդիրներ էլ ենք տեսնում ու փորձում անդրադառնալ դրանց: Մյուս կողմից խնդիրն այն է, որ Հայաստանում ամեն մեկն իր գործի մեջ մասնագիտացված չէ, ուզում է ամեն ինչից փորձել, սակայն ամեն մեկը պետք է փորձի գտնել իր տեղը ու փորձի գործ անել և ոչ թե նստել ու սպասել:

Վերջին շրջանում ակտիվ կերպով կազմակերպվում են բնապահպանական ակցիաներ: Դրանց մասնակցություն ունենու՞մ եք:

Գոռ Սուջյան - Մի անգամ մասնակցություն ունեցել ենք, բայց վաղուց էր: Կարծում եմ, ինչքան էլ փորձենք բնապահպանական ինչ-որ գործեր անել, աշխարհի մակարդակով ստեղծվել է մի համակարգ, որը բնությունը քանդում է, և մենք շատ փոքր ազդեցություն կարող ենք ունենալ դրա դեմ:

Քանի որ շուտով մոտենում են ընտրությունները, ապա նախընտրական քարոզարշավների ժամանակ կուսակցությունների կազմակերպած համերգներին մասնակցություն կունենա՞ք:

Գոռ Սուջյան - Եթե մարդն ինձ առաջարկի համերգին երգել, նվագել, կմասնակցեմ, բայց երբեք տվյալ կուսակցությունը չեմ պրոպագանդի, քանի որ ես ոչ մի կուսակցության չեմ պատկանում, իմ կուսակցությունը Դորիանսն է, մենք էլ` պատգամավորներ (HayNews.am` ժպտում է):

Գոհար Արամյան


HayNews.am