Facebook   Twitter
 
Հայտնի ըմբշամարտիկն ու ընկերները կրակել են Նորաշենի գյուղապետի ուղղությամբ․ ծանր վիրավորվել է մեկ հոգի

Հայտնի ըմբշամարտիկն ու ընկերները կրակել են Նորաշենի գյուղապետի ուղղությամբ․ ծանր վիրավորվել է մեկ հոգի

13 Փետրվարի 2018 - 23:14
Արարատի և Վայոց Ձորի մարզերի ընդհանուր իրավասության դատարանում Գագիկ Սարգսյանի նախագահությամբ ավարտվել է Արթուր Նազարյանի և Ռոբերտ Գալստյանի գործի դատական քննությունը:
28-ամյա ըմբշամարտիկ Արթուր Նազարյանին մեղադրանք էր առաջադրվել տուժողի առողջությանը խուլիգանական դրդումներով միջին ծանրության վնաս հասցնելու և ապօրինի զենք ձեռք բերելու, պահելու համար՝ ՀՀ քրեական օրենսգրքի 113 հոդվածի 2-րդ մասի 6-րդ կետով և 235 հոդվածի 1-ին մասով:

23-ամյա Ռոբերտ Գալստյանին մեղադրանք էր առաջադրվել տուժողի առողջությանը խուլիգանական դրդումներով միջին ծանրության վնաս հասցնելուն օժանդակելու համար՝ ՀՀ քրեական օրենսգրքի 38-113 հոդվածի 2-րդ մասի 6-րդ կետով:

Գործի քննության սկզբում մեղադրանքներ էին առաջադրվել խուլիգանական դրդումներով սպանության փորձի համար: Նախաքննության ընթացքում մեղադրանքը փոփոխվել է:

Ըստ մեղադրանքի՝ Արթուր Նազարյանը 2015 թվականի աշնանն ապօրինի ձեռք է բերել, պահել ու կրել է հրազեն հանդիսացող, նպատակային օգտագործման համար պիտանի «Glock 19» տեսակի ատրճանակ ու դրա համար նախատեսված, ռազմամթերք հանդիսացող փամփուշտներ:

Բացի այդ, նա ձեռք է բերել ու պահել է ռազմամթերք հանդիսացող՝ «AK-74» տեսակի ինքնաձիգի և «РПК-74» տեսակի ձեռքի գնդացիրի 5,45 մմ տրամաչափի 45 փամփուշտ, «ДШК» տեսակի գնդացիրի 12,7 մմ տրամաչափի 1 փամփուշտ:

Ըստ մեղադրանքի՝ 2017 թվականի մայիսի 3-ին, ժամը 18-ն անց 40-ի սահմաններում Արթուր Նազարյանն ընկերների՝ Ռոբերտ Գալստյանի, Ռոլանդ Գ.-ի, Դերենիկ Ս.-ի հետ, Ռոբերտ Գալստյանին պատկանող, հաշվառման համարանիշերը ռուսական համարանիշով փոխարինված սպիտակ գույնի «ՎԱԶ 217230» մակնիշի մեքենայով Արարատի մարզի Նորաշեն համայնքից ուղևորվել է դեպի Արտաշատ:

Արտաշատ-Վերին Արտաշատ ավտոճանապարհի 3-րդ կմ հատվածում Ռոբերտ Գալստյանը համընթաց ուղղությամբ ընթացող «ՎԱԶ-2107» մակնիշի մեքենային վազանցելիս՝ կտրուկ մեքենան վարել է դեպի աջ ու խոչընդոտել է վերոհիշյալ «07»-ի ընթացքին, ապա շարունակել է ճանապարհը:

«ՎԱԶ-2107»-ում երթևեկում էր Նորաշենի գյուղապետ Նորայր Գրիգորյանը: Վերջինիս առաջարկով վարորդ Կարեն Ղազարյանն ընթացել է առաջ, հավասարվել է վազանց կատարած մեքենային ու կանգնել է նրա կողքին:

Գյուղապետը, առանց մեքենայից իջնելու, առջևի աջ պատուհանից դիտողություն է արել Ռոբերտ Գալստյանին՝ մեքենան կտրուկ իրենց մեքենայի ուղղությամբ վարելու, իրենց մեքենայի ընթացքին խոչընդոտելու համար:

Գյուղապետին կոպիտ պատասխան են տվել, «առաջացել է տհաճ խոսակցություն»:

Այդ ժամանակ, ըստ մեղադրանքի, Ռոբերտ Գալստյանի վարած մեքենայի հետնամասում նստած Արթուր Նազարյանը իջել է մեքենայից, մոտեցել է գյուղապետի մեքենային, միջամտել է խոսակցությանը, ապա գյուղապետ Նորայր Գրիգորյանից պարզաբանում է պահանջել՝ իրենց դիտողություն անելու, «իրենց հետ իբրև հեգնանքով խոսելու և վիճաբանություն հրահրելու համար»:

Ստեղծված իրավիճակը չսրելու և վիճաբանությունից խուսափելու նպատակով գյուղապետը իր վարորդին հորդորել է շարունակել ճանապարհը: Սակայն Արթուր Նազարյանը պահանջել է, որ նրանք կանգնեն:

Գյուղապետի մեքենան, այնուամենայնիվ, շարժվել է առաջ:

Ըստ մեղադրանքի՝ Արթուր Նազարյանը Նորայր Գրիգորյանի ու Կարեն Ղազարյանի կողմից իր պահանջները չկատարելը «ցավագին է ընդունել և խուլիգանական դրդումներով ոտքով հարվածել է «07»-ի հետևի աջ անվաթևին», այնուհետև մեքենայում գտնվողներին մարմնական վնասվածքներ պատճառելու դիտավորությամբ նստել է Ռոբերտ Գալստյանի մեքենան ու պահանջել է, որ նա ընթանա գյուղապետի մեքենայի հետևից:

Ռոբերտ Գալստյանը մեքենան վարել է առաջ, հետևից՝ աջակողմյան հատվածով, հավասարվել է Կարեն Ղազարյանի վարած մեքենայի հետնամասի ձախակողմյան հատվածին, փորձել է խոչընդոտել նրանց ընթացքին ու կանգնեցնել՝ այդ կերպ օժանդակելով Արթուր Նազարյանի գործողություններին:

Արթուր Նազարյանը, ըստ մեղադրանքի, մեքենայի հետևի աջ դռան կիսաբաց լուսամուտից իր մոտ ապօրինի պահվող «Glock 19» ատրճանակով կրակել է «07»-ի ուղղությամբ:

Ռոբերտ Գալստյանը այդ կրակոցից հետո շարունակել է ընթանալ «07»-ի հետևից, հավասարվել է նրան, հետուառաջ է ընկել՝ շարունակելով օժանդակել Արթուր Նազարյանի գործողություններին:

Ըստ մեղադրանքի՝ Արթուր Նազարյանը «07»-ի ուղղությամբ ևս 3 կրակոց է արձակել և վարորդի առողջությանը պատճառելէ միջին ծանրության վնաս՝ աջ ուսագոտու փափուկ հյուսվածքների միջանցիկ, ձախ ազդրի փափուկ հյուսվածքների միջանցիկ, ձախ ազդրի փափուկ հյուսվածքների կույր, փոշտի կույր, ձախ սրունքի միջանցիկ հրազենային վնասվածքների, ձախ փոքր ոլոքի բաց բազմաբեկոր կոտրվածքների ձևով:

Վարորդին վնասվածքներ պատճառելուց հետո հետապնդողները դիմել են փախուստի:

Դատարանում Արթուր Նազարյանն ու Ռոբերտ Գալստյանն իրենց մեղավոր են ճանաչել, զղջացել են, նրանց միջնորդությամբ գործը քննվել է արագացված ընթացակարգով:

Դատարանը հաշվի է առել, որ Արթուր Նազարյանը ըմբշամարտի ՀՀ առաջնությունների ու միջազգային մրցաշարերի հաղթող ու մրցանակակիր է, բնութագրվում է դրական, նրա խնամքին են կինը, դեպքից հետո՝ 2017 թվականի հուլիսին ծնված որդին, վատառողջ հայրը: Արթուր Նազարյանն է ընտանիքի միակ կերակրողը:

Դատարանը հաշվի է առել, որ Ռոբերտ Գալստյանն ունի առողջական խնդիրներ, որոնց պատճառով զինվորական ծառայության համար ճանաչվել է ոչ պիտանի:

Արթուր Նազարյանը մեղավոր է ճանաչվել մեղսագրված արարքների համար ու վերջին հաշվով դատապարտվել է 3 տարի իրական ազատազրկման:

Ռոբերտ Գալստյանը մեղավոր է ճանաչվել ու դատապարտվել է 1 տարի իրական ազատազրկման:

Երկուսի պատժի սկիզբն էլ կհաշվվի 2017 թվականի սեպտեմբերի 21-ից:

HayNews.am
 
Նմանատիպ նորություններ
Կարող եմ շատ լավ աշխատել և՛ գործադիրում, և՛ օրենսդիրում. Թանդիլյանը՝ «առանց ավելորդ համեստության»
18 Նոյեմբերի 2018 - 23:51
«Սխալվում եք, եթե կարծում եք, թե ընտրություններին պատրաստվելու տեխնիկական խնդիրն էր հրաժարականի պատճառը»,- այսօր՝ նոյեմբերի 18-ին,
Ամփոփիչ մրցաշար. Ջոկովիչն անակնկալ պարտություն կրեց եզրափակիչում
18 Նոյեմբերի 2018 - 23:44
Աշխարհի առաջին ռակետ Նովակ Ջոկովիչն անակնկալ պարտություն կրեց Լոնդոնում անցկացած ATP-ի տարվա ամփոփիչ մրցաշարի եզրափակիչում:
«Դմփ-դմփ-հու»-ով ոչ միայն երկիր չենք կառուցելու, այլև քանդում ենք. Արմենուհի Կյուրեղյան
18 Նոյեմբերի 2018 - 23:35
ԱԺ ՀՅԴ խմբակցության պատգամավոր Արմենուհի Կյուրեղյանը 168.am-ի հետ զրույցում անդրադառնալով արտահերթ խորհրդարանական ընտրություններին՝ նկատեց՝ եթե այս ընտրություններում քաղաքական բոլոր ուժերը կրկին փորձեն ամեն ինչ տանել «սևերի» և «սպիտակների», ապա ամեն ինչ ցավալի ավարտ կունենա պետության համար։
Օգտատերերին զվարճացրել է թմրավաճառի՝ ոստիկանության հրապարակած լուսանկարը
18 Նոյեմբերի 2018 - 23:31
ԱՄՆ Ֆլորիդա նահանգում ձերբակալել են 31-ամյա Չարլզ Դիոն Մաքդաուելին, որին մեղադրում են թմրանյութեր պատրաստելու, պահելու և վաճառելու մեջ:
Բելլա Հադիդին «բռնացրել են» Նյու Յորքում գնումներ կատարելիս
18 Նոյեմբերի 2018 - 23:30
Հանգստյան օրերը շոփինգի եւ զբոսանքի համար շատ լավ ժամանակ է։ Դատելով ամեն ինչից, նույն կարծիքի է նաեւ մոդել Բելլա Հադիդը, որին «բռնացրել են» Նյու Յորքի լուսանկարիչները։
Արմեն Սարգսյանը շնորհավորական ուղերձ է հղել Լատվիայի նախագահին երկրի Ազգային տոնի առթիվ
18 Նոյեմբերի 2018 - 23:14
Հանրապետության նախագահ Արմեն Սարգսյանը Լատվիայի Հանրապետության Ազգային տոնի առթիվ նոյեմբերի 18-ին շնորհավորական ուղերձ է հղել նախագահ Ռայմոնդս Վեյոնիսին:
Հաագայի բողոքական եկեղեցին փորձում է հայկական ընտանիքին վտարումից փրկել
18 Նոյեմբերի 2018 - 23:05
Հաագայի բողոքական եկեղեցին արդեն երեք շաբաթ շուրջօրյա պատարագ է անում, որպեսզի հայկական ընտանիքին երկրից չվտարեն։
Խաշոգջիին սպանողները, հավանական է, նրա անդամահատված մարմինը Թուրքիայից ուղեբեռով են դուրս բերել
18 Նոյեմբերի 2018 - 22:52
Սաուդցի լրագրող Ջամալ Խաշոգջիին սպանողները, հավանական է, նրա անդամահատված մարմինը Թուրքիայից ուղեբեռով են դուրս բերել։ Այս մասին հայտարարել է Թուրքիայի պաշտպանության նախարար Հուլուսի Աքարը՝ տեղեկացնում է CNN Turk-ը։
Մելանյա Թրամփի մեկօրյա այցը Տորոնտո կազմել է 174 000 դոլար
18 Նոյեմբերի 2018 - 22:40
ԱՄՆ առաջին տիկին Մելանյա Թրամփի անցյալ տարի Տորոնտո կատարած մեկօրյա այցը 174 000 դոլար է արժեցել, տեղեկացնում է Quartz-ը։
1 | 2 | 3 | 4 | 5 | 6 | 7 | 8 | 24963
 
Լրահոս`