Սպանված զինվորը Վանաձորի մանկավարժականի ուսանող էր

Ինչպես ավելի վաղ տեղեկացրել էինք, փետրվարի 5-ին, ղարաբաղա-ադրբեջանական հակամարտ զորքերի շփման գծի հարավարեւելյան (Հադրութի) պաշտպանական ուղղությամբ տեղակայված դիրքերից մեկում հրազենային մահացու վիրավորում է ստացել ժամկետային զինծառայող, 20-ամյա Մարատ Ալեքսանդրի Դիմաքսյանը: Դեպքից կարճ ժամանակ անց արդեն պարզվեց, որ 20-ամյա զինվորը սպանվել է իր ծառայակցի` շարքային Գոռ Արայիկի Ալավերդյանի կողմից, ով ըստ նախնական տեղկատվության, խախտել է իրեն ամրակցված ինքնաձիգի հետ վարվելու կանոններն ու կրակոց արձակել ժամկետային զինծառայող Մարատ Դիմաքսյանի ուղղությամբ: Սպանված զինծառայողը ծնունդով Լոռու մարզի Վահագնի գյուղից է, ծառայության է մեկնել Վանաձորի զինկոմիսարիատից: Մեր թղթակցի հետ զրույցում Վահագնիի գյուղապետ Պետրոս Քոչինյանը պատմել է, որ սպանված տղայի ընտանիքը 7 անձից էր բաղկացած, տղան ընտանիքի ավագ երեխան էր: Գուղապետի խոսքով ընտանիքը հիմնականում զբաղվում է անասնապահությամբ, իսկ Մարատի հայրը` Ալեքսանդր Դիմաքսյանը, տարբեր աշխատանքներ է կատարում ընտանիքը պահելու համար:

Մարատ Դիմաքսյանը սովորել է Վահագնիի միջնակարգ դպրոցում, ապա ուսումը շարունակել Վանաձորի պետական մանկավարժական իստիտուտի պատմության բաժնում: Ուսման երկրորդ կուրսից մեկնել է զինծառայության: Նշենք, որ այսօր արդեն հարազատները այցելել են Երևան, իսկ վաղն արդեն տղայի մարմինը կտեղափոխվի հարազատ Վահագնի գյուղ:

Փաստի առթիվ ՀՀ ՊՆ քննչական ծառայության երկրորդ կայազորային քննչական բաժնում հարուցվել է քրեկան գործ ՀՀ քր. օր-ի 373 հոդվածի 3-րդ մասով (Զենքի, ռազմամթերքի և շրջապատի համար առավել վտանգ ներկայացնող առարկաների, նյութերի հետ վարվելու կանոնները խախտելը, որն անզգուշությամբ առաջացրել է մարդու մահ՝ պատժվում է ազատազրկմամբ՝ չորսից ութ տարի ժամկետով): HayNews.am-ը դեպքի հետ կապված նոր մանրամասներ կներկայացնի առաջիկայում:

HayNews.am