Ռիոյի փետուրները, հացադուլն ու Ադիբկյանի «գերճշգրիտ» կշեռքը

Եվ չնայած Գյումրիիի «դոմիկների» գորշ ու աղքատիկ ֆոնը «Ալեքսանդրապոլ» հյուրանոցով ծաղկեցրած Ղուկասյանն ամենևին էլ չի մասնակցել ծիածանի բոլոր գույներով փետուրներ կրող շքեղամարմին լատինաամերիկուհիների զանգվածային սամբային (չնայած ո՞վ գիտե, գուցե մասնակցել է), այլ ընդամենը Գյումրու քույր քաղաք Օզասկո է մեկնել պաշտոնական այցով, այնուամենայնիվ, կյանքի գույները դրանից չեն պակասել:

Ինչպես հնդկական կինոյում է մի երջանիկ ընտանիքի լուսավոր կյանքը հանկարծակի մթագնում մի անտրամաբանական «դժբախտ դեպք» (ասենք երջանիկ ընտանիքը պիկնիկի է գնում, մեկ էլ մի թափառաշրջիկ գողանում է նրանց փոքրիկ տղային ու միայն 40 տարի անց է վերջինս իմանում, որ ոմն հարուստ Ռաջի որդին է), այնպես էլ Մաշտոցի պուրակի պահպանման համար համառ մարտեր մղող ակտիվիստների պայքարը հանկարածակի մթագնեց, երբ պարզ դարձավ, որ «բուտիկների» դեմ հացադուլ հայտարարած ակտիվիստը սատանիստ է:

Ինչպես ընտրություններից առաջ է հայ հասարակությունը բաժանվում ընդդիմադիր ու դիմադիր հատվածների, այնպես էլ այսօր բաժանվեցին «սատանիստակողմերի» ու «սատանիստադեմերի»: Մի մասն իր իմացած 7 հարկանի հայհոյանքների ողջ պաշարը հրամցրեց` «փետրահան» անելով հացադուլավորին, մյուս մասն էլ, որոշեց զորավիգ լինել սատանիստին, և այս ամենի շուրջ ստեղծված «ազգային-ազատագրական պայքարը» հասավ նրան, որ այս ընթացքում բոլորը համ բուտիկները մոռացան, համ բուտիկի տեղում գտնվող ծառերը, համ բուտիկների ծլում-ծաղկում-բարգավաճումն ապահովող ոստիկաններին, համ էլ բետոնաշաղախիչ մեքենաների դեմ անզեն դուրս եկող քաջարի բնապահպաններին:

Իսկ ահա սոցիոլոգ Ահարոն Ադիբեկյանը հենց նոր կշեռքից իջեցրեց քաղաքական ուժերին: Ու ըստ Ահարոնյանի չափումների (կամ գուցե պատվերի)` հայտնի դարձան գերծանր քաշայինները: Չնայած դժվար է ասել հայտնի դարձան. մենք բոլորս արդեն 4 տարի գիտենք, որ դրանք ՀՀԿ-ն ու ԲՀԿ- են:

Ինչ վերաբերում է հայտնություններին. այսօր իրավապաշտպան (տեսնես ու՞մ իրավն է պաշտպանում) Միքայել Դանիելյանի խոսքերից հայտնի դարձավ, որ Նաիրի Հունանյանը ոչ թե ահաբեկիչ է, այլ քաղբանտարկյալ: Սրանից հետևում է, որ Բեն Լադենն էլ Մայր Թերեզան էր, իսկ Պաբլո Էսկոբարը մի հասարակ, փետրավոր հրեշտակ երկրի երեսին:

HayNews.am