Անժելա Սարգսյանը՝ Նարեկացու մասին ֆիլմում

Գրականագետներից ոմանք պնդում են, որ Նարեկացին ամենեւին էլ հոգեւոր հովիվ չէր, պարզապես ճգնավոր էր, իսկ տվյալ ֆիլմում ակնհայտ է «Կյանքի խոսք» եկեղեցու ազդեցությունը, այս ամենին գումարած նաեւ այն, որ «Հովիվ»-ում նկարահանվել է վերջերս իր «բաց» լուսանկարների հաշվին սկանդալային դարձած դերասանուհի Անժելա Սարգսյանը: Մեր այս դիտարկմանն ի պատասխան՝ ֆիլմի ռեժիսոր Արտակ Ավդալյանն սկզբում նշեց. «Հայաստանում, Վրաստանում, Ռուսաստանում եւ Արեւելյան Եվրոպայում Կաթողիկե եկեղեցու առաջնորդ Ռաֆայել արքեպիսկոպոս Մինասյանի առաջարկն էր ֆիլմ նկարահանել Նարեկացու մասին: Նա էլ հոգացել է բոլոր անհրաժեշտ ծախսերը»: Մեր զրուցակիցը հայտնեց, որ փորձել են Նարեկացուն ներկայացնել մարդու, ընդհանրական եկեղեցու անդամի կերպարով, որպեսզի ֆիլմի ասելիքը հասանելի լինի ոչ միայն հայ, այլեւ արտերկրի հանդիսատեսին. «Նարեկացու մասին առայսօր քիչ բան է հայտնի, Նարեկավանքն էլ վաղուց է քանդվել, բայց մենք գտել ենք այն քարայրը, որտեղ ճգնել է Նարեկացին ու նկարահանումների մի մասը իրականացրել այնտեղ»: Ավդալյանը հավելեց. «Նարեկացին ընդհանրական վարդապետ է՝ ընտրված ու սրբացված բոլոր եկեղեցիների կողմից: Նա երբեք ճգնավոր չի եղել, շուրջ 7 տարի Նարեկա գյուղի հոտն է պահել: Ինչ վերաբերում է դերասանուհի Անժելա Սարգսյանին, հիանալի է նրա խաղը, իսկ իր անձնական կյանքը մեզ չի հետաքրքրում»:

Ըստ Aravot.am-ի:

HayNews.am