Լրագրող Հայկ Գևորգյանի գործում սենսացիա կա

«Հայկական ժամանակում» կարդում ենք.

Մեր թերթի թղթակից Հայկ Գևորգյանը, որը «վրաերթի» հետ կապված հայտնի պատմությունից 20 օր հետո` այս տարվա փետրվարի 3-ին կալանավորվեց, երեկ վերջապես ստացավ իր կալանքի վերաբերյալ Երևանի Կենտրոն և Նորք-Մարաշ վարչական շրջանների ընդհանուր իրավասությունների դատարանի որոշումը: Ինչպես սպասվում էր, որոշման մեջ սենսացիոն մանրամասներ կան: Դատավոր Արշակ Վարդանյանի` հունվարի 23-ին կայացրած որոշումից տեղեկանում ենք, որ Հայկ Գևորգյանի նկատմամբ քրգործը հարուցվել է դեռ 2011 թվականի մարտի 15-ին: Պարզ է, չէ՞, «վրաերթը» տեղի է ունեցել 2012 թվականի հունվարի 13-ին, իսկ դրան վերաբերող քրեական գործը հարուցված է եղել դրանից 10 ամիս առաջ: Դատական նիստը, որում քննարկվել է Հայկ Գևորգյանի նկատմամբ կալանքը որպես խափանման միջոց ընտրելու հարցը, տեղի է ունեցել դռնփակ, տևել է 18 րոպե, որի ընթացքում դատավոր Արշակ Վարդանյանը հասցրել է մանրամասն ուսումնասիրել 23 էջ փաստաթուղթ, այդ թվում նաև «տուժողի» ձեռագիր ու դժվարընթեռնելի ցուցմունքը, դատաբժշկական եզրակացության անընթեռնելի տեքստը:

Թե քանի րոպե է մտածել դատավորը ՀՀ քաղաքացուն կալանքի ենթարկելու մասին որոշումը կայացնելուց առաջ` կռահեք ինքներդ: Նշենք, որ Արշակ Վարդանյանը ԽՍՀՄ ԿԳԲ-ի հայտնի քննիչ, ապա նաև դատավոր Ժորա Վարդանյանի որդին է: Մինչ դատավոր դառնալը նա ընդգրկված էր «Մարտի 1-ի» գործը քննող քննչական խմբում` որպես քննիչ:

HayNews.am