Պատերազմի ժամանակ նվիրված մարդիկ տարիների ընթացքում փչացան. Սեֆիլյան

«Քննադատությունը պիտի լինի կառուցողական, ի ՞նչ է նշանակում բոյկոտել և կոչ անել, որ մյուսներն էլ իրենց երեխաներին բանակ չուղարկեն, սա սրտացավ քննադատություն չէ, սա քանդող է մյուս նախարարությունների համեմատ կայացած կառույցի հանդեպ: Ես կողմնակից եմ սրտացավ պայքարի, որն ուղղված է բանակի ներսում տիրող անօրինականությունների և հանցագործությունների կոծկումների դեմ, բայց բանակը քանդել պետք չէ, մենք հակառակորդ ունենք և դեռ տարածաշրջանում իրականում ամենամարտունակը լինելու տեղ ունենք, դեռ ամենամարտունակը չենք, եթե հաշվենք նաև Թուրքիային, մինչ դեռ մեր դոկտրինում չկա կետ, թե ինչ ենք անելու, եթե Թուրքիան հարձակվի, հույսը ռուսների վրա ենք դրել»:

Ժիրայր Սեֆիլյանը նկատում է, որ պատերազմական իրավիճակը թույլ չտվեց հայեցակարգային միջամտություն կատարել և ունեցանք ռուսական մոդելի հիմքով «կայսերական» բանակ»:

«Արցախի պատերազմում մենք կարողացանք խախտել մեզ պարտադրվող այդ մոդելը և հաղթեցինք: Իսկ այժմ, պնդում եմ՝ համակարգը պիտի փոխվի, ինչ փոփոխություններ էլ լինում են, միևնույն է, անհատի դերը շարունակում է թելադրող մնալ: Մարդիկ, որոնք պատերազմի ժամանակ ապացուցել էին իրենց նվիրվածությունը, տարիների ընթացքում փչացան»:

«Սարդարապատ» շարժման անդամը պնդում է, որ բանակը 1999 թվականից հետո իշխանությունների ձեռքին գործիք դարձավ, ու այն այսօր էլ շարունակում է օգտագործվել` վարչակարգին պաշտպանելու նպատակով: ՀՀ զինված ուժերի 20-ամյակին ընդառաջ, Սեֆիլյանը մաղթեց, որ ունենանք իրապես ազգային բանակ՝ տարածաշրջանում ամենահզորը և ակնարկեց, թե այս օրերին պատերազմն անցած հրամանատարները հիշողությունների մեջ կընկնեն ու գուցե իրենց ներսում ինչ-որ բան փոխվի :

HayNews.am