Գևորգ Պողոսյան. Մեծամասնությունը չի հավատում, որ կլինի արդար ընտրություն

Փորձագետը հայտնեց, որ ըստ հարցումների` խորհրդարան են անցնելու ՀՀԿ-ն, ԲՀԿ-ն և ՀԱԿ-ը. «Նրանց ձայն է տալու ընտրողների 75 տոկոսը: Եվս 3 կուսակցություն ՕԵԿ-ը, ՀՅԴ-ն և «Ժառանգությունը» կանցնեն խորհրդարան, եթե իրենց կողմը կարողանան գրավել ընտրազանգվածի տատանվող 15 տոկոսին»: Սոցիոլոգը բացառեց «Ազատ դեմոկրատներ« նոր ձևավորված կուսակցության անցումը խորհրդարան:

Նա նաև նկատեց. «Հարցումների ընթացքում զգացվել է, որ ՀԱԿ-ից որոշակի հիասթափություն կա, որովհետև նրանից շատ բան էին սպասում: Սակայն ՀԱԿ-ը ցանկացած ժամանակ կարող է կիրառել իր ռեզերվը»:

Պողոսյանի խոսքով` չնայած նրան, որ ժողովրդի դժգոհությունը մեծ է, այնուամենայնիվ, մեծամասնությունը հակված է ընտրելու իշխանական կուսակցություններին. «Մարզային ընտրողներն ավելի իշխանամետ են, քան մայրաքաղաքայինները, բայց խորհրդարանում մեկ կուսակցություն չի կազմելու մեծամասնություն: Բարդ պայքար է սպասվում, որի ընթացքում կկիրառվեն բոլոր ավանդական ներքին հնարքները: Հայ ընտրողը ծանոթ չէ կուսակցությունների ծրագրերին. ընտրում է ոչ թե կուսակցություններին, այլ դրանց ղեկավարներին: Ընտրողների մեծամասնությունը չի հավատում, որ կլինեն արդար ընտրություններ»:

«Ըստ վիճակագրության խորհրդարանական ընտրություններին մասնակցելու է ընտրողների 55-56 %-ը, ի տարբերություն նախագահականի, որին ավելի շատ մարդիկ են մասնակցում: Խորհրդարանական ընտրություններից կարելի է դասեր քաղել նախագահական ընտրությունների համար»,- նշեց փորձագետը:

HayNews.am