Հանրապետականների կծիկը քանդեցին ռամկավարները

Որոշ փորձագետներ Հ. Առաքելյանի այս քայլերը համարում էին բացահայտ քաղաքական շանտաժ ուղղված վարչապետի և արդարադատության նախարարի դեմ, քանզի ռամկավարների ներկուսակցական գզվռտոց-հակասությունները, որոնք հայտվել էին Արդարադատության նախարարության իրավասության տիրույթում, կարող էին իօգուտ Հ. Առաքելյանի և նրա խմբի լուծվել, եթե լիներ վարչապետ Տիգրան Սարգսյանի քաղաքական կամքն ու համապատասխան հանձնարարականը նախարար Հ. Թովմասյանին: Նման դեպքերում, սակայն, հարցը հրապարակային հնչեղություն չէր ստանա, և ընդհանրապես՝ շանտաժն այն երևույթն է, որն հրապարակայնորեն չի արվում, հատկապես, երբ խնդիրը առընչվում է իշխանության առանցքային դեմքերից մեկին:

Նշենք նաև, որ կային որոշ խոսակցություններ այն մասին, որ ռամկավար Հարութն ու նրա շրջապատը Նաիրիտին որոշ ապրանքատեսակներ են մատակարարել և տարիներ շարունակ հաց վաստակել, սակայն այդ շրջանում պայմանագրերը խզվել են, և նա ուղղակիորեն վրեժխնդիր է լինում: Սա էլ թույլ փաստարկ է…

Մի բան պարզ էր. Հ. Առաքելյանը ինքնագլուխ չէր գործում և չէր գնա նման արկածախնդրության, եթե հանրապետության ներսից կամ դրսից չունենար աջակիցներ: Համաձայնվեք, որ քաղաքական դերակատարություն ունենալու հավակնություններ ունեցող գործիչը բացահայտորեն ու կոպիտ կերպով պատերազմ չէր հայտարարի իշխող ՀՀԿ-ին, հատկապես, երբ խոսքը վերաբերվում է ռամկավար-ազատականներին (իրենց տևական գործունեության ավանդույթներով հանդերձ), որոնք իրենց պատմության ընդացքում ցուցաբերել են նուրբ և հաշվենկատ քաղաքական վարքագիծ: Սա անգամ ՀԱԿ-ի ոճը չէ:

Եվ եթե ուշադիր հետազոտում ենք Հ. Առաքելյանի ուղարկած «բաց ֆաքսերը», մամլո ասուլիսներն ու հրապարակային ելույթները, հստակ երևում է, որ այդ ամենը միտում ուներ հարված հասցնելու վարչապետ Տիգրան Սարգսյանի հեղինակությանը: Սակայն հարցերի հարցը այդպես էլ բաց էր մնում. ո՞վ է Հ. Առաքելյանի պատվիրատուն, ո՞ր քաղաքական ուժն է ռամկավար Հարութին «դարձրել տիկ, ինքը դարձել բերան», և ո՞վ է այդքան շատ ցանկանում հարված հասցնել Տիգրան Սարգսյանին: Պարզ է, որ Հայաստանի վարչապետը (անկախ նրանից, թե ով է և որ ժամանակաշրջանում) ունի ակնառու և թաքնված հակառակորդներ ու մրցակիցներ, որոնք առիթը բաց չեն թողնելու քողարկված կամ բացահայտ հարված հասցնելու համար: Սակայն անհայտ էր, թե ո՞ր ճամբարն էր գործում, ՀԱ՞Կ-ը, իսկ միգուցե երկրորդ նախագահի թիմը...

Ահա և սենսացիան. խճճված ու բարդ կծիկը քանդվեց, և դա քանդեցին հենց ռամկավարները: Այս օրերին Հայաստանում են գտվում ՌԱԿ համաշխարհային ցանցի պատասխանատուները: Կասկածից վեր է, որ Սփյուռքում գործող ավանդական կուսակցության ղեկավարությունը «դեսանտ է իջել» նախընտրական Հայաստանում սեփական շահերը պարզաբանելու, պայմանավորվածություններ ձեռք բերելու և վերջնական ճշգրտումներ անելու համար: Կասկածից վեր է նաև, որ «ռամկավար Հարութի թեման ևս քննարկվելու է»...

Եվ իրոք, «Հարութի արկածներն» իրենց երկար սպասեցնել չտվեցին, և Կառավարության պաշտոնական լրահոսը հաղորդեց, որ վարչապետ Տիգրան Սարգսյանը փետրվարի 2-ին ընդունել է ՌԱԿ կենտրոնական վարչության ատենապետ Մայք Խարապյանին և ՌԱԿ Լիբանանի շրջանային վարչության ատենապետ Հարություն Երկանյանին: Այլևալ տեղեկատվության հետ մեկտեղ հաղորդվում է նաև, որ ՌԱԿ ատենապետը ներողություն է խնդրել Տիգրան Սարգսյանից՝ իր կուսակիցներից մեկի կողմից վարչապետի հասցեին հնչեցրած անհիմն մեղադրանքների համար՝ ասելով. «Առաջին հերթին ցանկանում եմ իմ ներողամտությունն հայտնել՝ Ձեր նկատմամբ ներկայացված անարդար մեղադրանքների համար: Ես շատ խիստ կերպով խոսել եմ: Դժբախտաբար կան մարդիկ, որոնք քաջալերում են նման քայլերը, ամեն մարդ էլ ցանկանում է վարչապետ դառնալ»:
Ահա և վերջ: Պարզվում է, որ «շան գլուխը թաղված է» հենց ՀՀԿ-ում: Հանրապետականներից ո՞վ, կամ ո՞վքեր էին ամենաշատը ցանկանում վարչապետ դառնալ, որ իվերջո, զբաղեցրաց պաշտոններից էլ զրկվեցին: Հիշենք վերջին աղմկահարույց հրաժարականները: Հենց այս կարկառուն հանրապետականներն էին Տիգրան Սարգսյանի դեմ տեղեկատվական ու քաղաքական բացահայտ արշավանքի կազմակերպիչներն ու հիմնական հովանավորները: Հենց նրանք են, որ քաղաքականությամբ զբաղվելու համար ինտելեկտին մեծ տեղ չեն տալիս, ասել կուզի՝ քաղաքականությունը նրան համար շախմատ չէ, այլ ասենք բռանցքամարտ կամ ըմբշամարտ, որի հետևանքով էլ «գարունը ձմեռվանից շուտ եկավ», և կորցրեցին իրեն ունեցած պաշտոնները՝ ընդամենը ձեռք բերելով մշուշոտ քաղաքական ապագա: Չէ՞ որ ըմբշամարտում երբեմն պատահում են դեպքեր, երբ «պրիյոմ ես անում ու տակը մնում»:

Հ.Գ. Ճիշտ չէր լինի, եթե այդ կարկառուն հանրապետականների աննունները նշեինք, դա ՀՀԿ ներքին խոհանոցի հարցերն են: Ճիշտ չէ նաև միանշանակորեն պնդելը, թե ռամկավար Հարութի պատվիրատուները հենց նրանք են: Թող փաստերն իրենք խոսեն, իսկ մնացածն արդեն խղճի ու բարոյականության տիրույթից են...

Արամ Ենգիբարյան

HayNews.am