Ապրիլի 24-ին Թուրքիայում սպանված հայ երիտասարդի գործով վկան փոխել է ցուցմունքը

Այս մասին տեղեկացնում է թուրքական «Սաբահ» պարբերականը:

Հայազգի երիտասարդի սպանության գործով անցնող վկաներից Հալիլ Էքշին խոստովանել է, որ կեղծ ցուցմունք է տվել:

«Երբ այդ դեպքը տեղի ունեցավ, ինձ զանգահարեց մի մարդ, ով ներկայացավ որպես Քըվանչ Աղաօղլուի հորեղբայր: Նա ասաց, որ լավ կլինի, եթե ես ցուցմունք տամ իր ասած ձևով: Ես էլ ստորագրել եմ նրա տված թղթի տակ»,-նշել է վկան, ով սպանության պահին եղել է դեպքի վայրում:

Նա նաև հավելել է, որ իրականում տեսել է սպանության պահը, թեև կեղծ վկայության մեջ գրված է եղել, որ չի տեսել:
«Ես տեսա, թե ինչպես Քըվանչը զենքը պահեց Սևակի վրա և կրակ արձակեց»,-խոստովանել է Էքշին` նշելով, որ սպանության դրդապատճառները չգիտի:

Նշենք, որ ներկայիս Թուրքիայի Բաթման նահանգում պարտադիր զինծառայություն անցնող Սևակ Բալըքչըի զորացրմանը մնացել էր 23 օր, երբ նա սպանվեց: Թեև պաշտոնական շրջանակներում նրա մահվան պատճառ է նշվում «զենքի հետ անփույթ վարվելու հետևանքով դժբախտ պատահարը», սակայն ավելի իրատեսական է թվում այն, որ հայազգի երիտասարդին միտումնավոր սպանել են Հայոց ցեղասպանության զոհերի հիշատակի օրը:

HayNews.am