Թուրքիայի և Ադրբեջանի միջև վիզային ռեժիմի պատճառն Իրանն է. «Հյուրիյեթ»

«Եթե Թուրքիան վիզային ռեժիմը վերացրել է Վրաստանի, Սիրիայի, Ռուսաստանի, Ուկրաինայի, անգամ աֆրիկական երկրների հետ, ինչո՞ւ Ադրբեջանի հետ մինչև հիմա անցագրերով է մուտքը»,-նման հարցադրում է կատարում թուրք լրագրողը և փորձում գտնել այդ հարցի պատասխանը Բաքվում:

Անդրադառնալով պաշտոնական վարկածին, թե «դա թղթաբանական խնդիրների հետևանք» է, «Հյուրիյեթը» կանգ է առնում այլ պատճառների վրա, որոնցից գլխավորը, ըստ ադրբեջանցի պաշտոնյաների, Իրանն է:

«Իրանի ու Ադրբեջանի նույնպես միջև նույնպես վիզային ռեժիմ գոյություն ունի: Իսկ պաշտոնական Թեհրանը Բաքվից պահանջում է` եթե Թուրքիայի հետ վիզային ռեժիմը վերացվի, դա պետք է արվի նաև Իրանի հետ: Իսկ Իրանն Ադրբեջանին ճնշելու լծակ ունի, այն է` Նախիջևանը: Ադրբեջանի և Նախիջևանի միջև կապն իրականացվում է Իրանի միջոցով: Եվ եթե ադրբեջանական կողմը հաշվի չառնի Թեհրանի այդ պահանջը, կարող է Նախիջևանի հետ կապը կորցնել: Ուստի ադրբեջանցիներն այժմ չեն կարող Թուրքիայի հետ վերացնել վիզային ռեժիմը, քանի որ ստիպված կլինեն նույնն անել նաև Իրանի հետ: Սակայն այդ դեպքում Ադրբեջանը կարող է բախվել այլ խնդիրների հետ. Իրանում ապրում է մոտ 35 մլն էթնիկ ադրբեջանցի, ովքեր Իրանի քաղաքացիներ են: Ադրբեջանում վախենում են, որ բնակչության միջոցով Իրանը կկարողանա իր ազդեցությունը տարածել նաև Ադրբեջանի վրա»,-ադրբեջանցի քաղաքական գործիչների, մտավորականների, լրագրողների հետ զրույցից հետո նման եզրակացության է գալիս «Հյուրիյեթի» թղթակիցը:

Հ.Գ. Քարտեզը, որում Արցախի Հանրապետությունը պատկերված է որպես առանձին միավոր, տեղադրված է նույն այս հոդվածում:

HayNews.am